كان لى صديق متأثر جدا بالرئيس مبارك خصوصا فى نقطه خيار السلام وكل شويه ينبهنا لاهميه الخيار خيار السلام قصدى حتى لما كنت بقوله على الاخطار اللى بتحيط بينا كان مصمم برضه على اهميه الخيار ييه قصدى خيار السلام
تعجبى من اصراره على هذا الخيار ما تخفش المرة دى افتكرت خيار السلام دفعنى لان ادقق النظر لكل كلام السيد الرئيس عن موقف مصر من الاحداث التى تحيط بها فاكتشفت وللاسف متأخرا اهميه الخيار فى خطابات السيد الرئيس فعندما قامت الحرب الامريكيه على العراق كان الخيار _ خلاص بقى انت عارف طبعا قصدى _ هو رد مصر على الغزو الامريكى طيب ماشى مفيش مشكله الغزو تم وسقطت بغداد على يد النازيين الجدد وبرضه الخيار لسه هو رد مصر
بعدين جاءت حرب اسرائيل على لبنان وبرضه السيد الرئيس تفضل مشكورا بالرد عليهم بالخيار وفحهم مش بس كده لا دا كمان ادان حزب الله على اللى عمله وبينى وبينكم عنده حق يعنى هو السيد الرئيس فاضى للكلام الفارغ ده ويسيب السلطه ييه قصدى الخيار ويقعد ينشغل بالكلام ده
وفى الوقت الحالى لو قلت لصاحبى عن ضرب سوريا هايقولى برضه لا بديل لخيار السلام
ولو قلتله طيب وتقسيم السودان هايرد بتذمر ما قولتلك قولتلى ايه خيار السلام طبعا اومال انت كنت فاكر ايه
وانا بفكر فى الموقف السابق نظرت امامى وجدت اخويا جاى ومعاه شنطه فيها طماطم وخيار وفلفل وجرجي بسأله عن الاسعار بتاعتهم وعرفت ان الخيار اغلى حاجه سألته فى ضيق ليييييييييه
قالى وبنظره استغراب لان الخيار اهم حاجه فى السلطه
الثلاثاء أكتوبر 23, 2007 10:36 pm
